ಖಾಲಿತನದ ಕುರುಹು..!

ಊರಿಗೇ ನೆರಳಾ ಕೊಡುವಂಥ ಮರಕೆ

ಬಿರುಗಾಳಿ ಬಂದು ರಪ್ಪೆಂದು ಬಡಿದಾಗ -

ಉರುಳುವಾ ಜಾಗ ಸಿಗದಾಗಿದೆ.!

ಸಂತಾಪ ತೋರಿ ಸಂತೈಸೊ ಕೈಗೆ

ಮೊನಚಾದ ಮುಳ್ಳು ತಾನೊಂದು ಇರಿದಾಗ - 

ನೇವರಿಸೊ ಕೈಯೊಂದು ಇರದಾಗಿದೆ.!

ಬೇಲಿ..!

ಇಣುಕಿ-ಇಣುಕಿಣುಕಿ,

ಬೇಲಿ ದಾಟಿದ ಕೆಣಕಿ;

ನಾಚಿ ಕೆಂಪಾದ ಆಕೀನ ಕಂಡು -

ನುಡಿದ 'ನೀ ಚಂದ್ರಮುಖಿ'..

ಗಾಳಿಯು ಚಾಮರ ಬೀಸಿ,

ಅಂತರಕುಂಟೇ ಜಾಗ?

ಬಾಚಿ ತಬ್ಬಲೋಲಗದ ಸದ್ದು -

ಶುರುವು ಒಲವಿನಾ ರಾಗ. 

ಸಂಬಂಧ ಸೂಚಕ

ಸಾಗರ ನಾವಾಗದಿದ್ದರೇನಂತೆ
ನದಿಯಾಗಿ ಹರಿದು ಸಂಗಮಿಸಿದರಾಯ್ತು;
ಭುವಿ ಸೊಬಗು ನಮ್ಮದಲ್ಲದಿದ್ದರೇನಂತೆ
ತಣಿಸೊ ಮಳೆ ನಾವಾದರಾಯ್ತು..

ನೆನಪು..!

ಕಬ್ಬ ಗಿಲ್ಲಲು ಹೋಗಿ ಬೆಲ್ಲವದು ಸಿಕ್ಕಂತೆ,
ನೆನಪ ಕೆದಕಲ್ಹೋಗಿ ಖನಿಜವದು ಸಿಕ್ಕಂತೆ,
ಅಂದಿದ್ದ ಘಳಿಗೆಗಳು ಸಾಲಾಗಿ ನಗುಬೀರಿ -
ಇಂದೆನ್ನ ಮನಸನ್ನು ಮುದಗೊಳಿಸಿದೆ..

ಸತ್ಸಂಗ..

ಅಂತರಂಗ ಅನ್ವೇಷಣೇ ಸಮಚಿತ್ತ ಫಲಪ್ರದೇ,
ಸತ್ಸಂಗ ಮನೋಹಾರೇ ಸದ್ಬಾಳ್ವೆ ಶುಭಪ್ರದೇ..

ನಯನದ ಸರಸ..!

ಬಾಂಧವ್ಯ ಬೆಸೆಯಲು ಮಿಲನದಿ
ಮನವು ಬಯಸಿದೆ ತುಡಿತದಿ;
ಏಕೋ ತಿಳಿಯದು ನಿನ್ನ ನಯನವು
ಕರೆಯಿತೆನಿಸಿತು ಬಳಿಗೆ ಸರಸದಿ...

ನಿದ್ದೇಲೂ ಭಯ..!!

ನಿದ್ದೆಗೆಟ್ಟೆನೆ ಪ್ರಿಯೆ
ರಾತ್ರಿಯಿಡೀ ನಿನ್ನ
ನೆನೆಯುತ…
ಕತ್ತಲಲಿ ನಿನ್ನ ಮುಖವ
ನೋಡಿದ ಭಯದಿಂದ
ನಡುಗುತ.!

ಬೇಕು..ಬೇಡ..!

ಬೇಕಾಗಿರುವುದು ಸಿಗದೆ
ಬೇಡದಿರುವುದು ಸಿಗುವ
ಈ ಜೀವನವೇ ದಂಡ!
ಅದಕೆ ಸಿಗುವುದು
ಗಂಡನಿಗೆ ಹೆಂಡತಿ
ಹೆಂಡತಿಗೆ ಗಂಡ..!

ಸನಿಹಕಾಗಿ ಬಿನ್ನಹ

ಹೂವೊಂದು ನಾಚಿತು

ನಿನ್ನ ಚೆಲುವ ನೋಡಿ,

ಕೋಗಿಲೆಯು ಮರುಗಿತು

ನಿನ್ನ ದನಿಯ ಕೇಳಿ.

       ಮಿಂಚಂತೂ ಮಲಗಿತು

ನಿನ್ನ ನಯನ ನೋಡಿ,

ಬಳ್ಳಿಯಂತು ಒಣಗಿತು

ನಿನ್ನ ನಡುವ ನೋಡಿ.

ಜೋಗದ ಸಿರಿ ಕುಗ್ಗಿತು

ನಿನ್ನ ನುಣುಪ ನೋಡಿ,

ನವಿಲೊಂದು ಅಲೆಯಿತು

ನೀನು ನಡೆಯೆಂದು ಕಾಡಿ.

ನಾನಂತೂ ಬಂದೆನು

ನಿನ್ನ ಒಲವ ಅರಸಿ,

ಹಾತೊರೆದು ನಿಂತೆನು

ನಿನ್ನ ಸನಿಹ ಬಯಸಿ..

ಯಜಮಾನ್ರ ಗುಣಗಾನ!

ಆಕೆ ಹೇಳಲು -
"ನಮ್ಮೆಜಮಾನ್ರು ನಾಯಿಯಂತೆ 
ಮನೆ ಕಾಯ್ತಾರೆ"
ಈಕೆ ಪಂದ್ಯಕ್ಕೆ ಬಿದ್ದು ಬೀಗಿದಳು -
"ನಮ್ಮವರು ಕತ್ತೆಯಂತೆ 
ಮನೆಗೆಲಸವನ್ನೆಲ್ಲಾ ಮಾಡ್ತಾರೆ"!!

ಏನೆಂದು ಬಣ್ಣಿಸಲಿ ಪ್ರಿಯೆ ನಿನ್ನ?

ಮುದ್ದು ಕೋಮಲದ ಹೂವೆಂದು ಬಣ್ಣಿಸಲೆ?
              ಮಬ್ಬಾದೊಡನೆ ಕೋಮಲತೆಯು ಮಾಸುವುದಲ್ಲೆ!
ಹೊಳೆಯುವ ಉಷೆಯೆಂದು ಬಣ್ಣಿಸಲೆ?
ಮೋಡದ ಮರೆಗದರ ಕಾಂತಿ ಕುಗ್ಗುವುದಲ್ಲೆ!
ಬೆಳದಿಂಗಳ ಚಂದ್ರನೆಂದು ಬಣ್ಣಿಸಲೆ?
ಗ್ರಹಣದ ಗ್ರಹಚಾರವು ಅದನೂ ಕಾಡುವುದಲ್ಲೆ!
ಸಹ್ಯಾದ್ರಿಯ ಸೊಬಗೆಂದು ಬಣ್ಣಿಸಲೆ?
ಮಾನವನ ಚಪಲಕ್ಕೆ ಕೊಲೆಯಾಗುತಿಹುದಲ್ಲೆ!
ಜಲರಾಶಿಯ ಬಳುಕೆಂದು ಬಣ್ಣಿಸಲೆ?
ಕಲುಷಿತದಿಂದ ಆವೃತವಾಗಿದೆಯಲ್ಲೆ!
ಏನೆಂದು ಬಣ್ಣಿಸಲಿ ಪ್ರಿಯೆ ನಿನ್ನ?
ನಿನ್ನ ಸೌಂದರ್ಯದ ಆರಾಧಕನನ್ನಾಗಿ ಸ್ವೀಕರಿಸು ನನ್ನ.. 

I...We..!!

ನಾನು-ನಂದೆಂದು

ಅಹಂನಲ್ಲಿ ಮಿಂದೇಳುವುದೇ - 'I'llness;

ನಾವು-ನಮ್ದೆಂದು

ಸಹಬಾಳ್ವೆ ಎಂದೇಳುವುದೇ - 'We'llness..

ಕೊರೋನ effect..

ನಲ್ಲೆಗೆ ಥಟ್ಟಂತ ನೆನಪಾಯ್ತು,
'ಹೋಗಿದ್ನಲ್ಲ  ನಲ್ಲ ಆಚೆ
ತರೋಕೆ ಕೊತ್ತಂಬ್ರಿ..'!

ದೂರ ಸರಿದು ಕೇಳಿದ್ಲು;
"ಸ್ಯಾನಿಟೈಸ್ ಮಾಡ್ಕೊಂಡ್ಯೊ ಇಲ್ವೋ?
ನಂಗಂತು ಈಗ ಫುಲ್ ವರಿ.."

ಬಾಹು ಬಂಧನ..!!

ಉತ್ತೇಜನದಿ ಆದದ್ದೇನೊ ನಿಜ,
ನನ್ನ-ನಿನ್ನ ಬಾಹು ಬಂಧನ;
ಉನ್ಮಾದದಿ ಚಂದ್ರನ ಗುರುತು ಮೂಡಿ -
ತಿಳಿಯಿತು, ಬಾವು ಕೂಡ ನಂದನ..!

ಸಲ್ಲದು ತಗಾದೆ...

ಕೆಂಪಡರಿದ ಬಾನಲ್ಲಿ ನಸುಕಿನಾ ಗುರುತು,
ಚಿಗುರಿನ ತಾವೆಲ್ಲಿ ಬೇಸರದ ಹೊರತು!?
ಒಣಗಿದಾ ಎಲೆಗಳವು ಸುಳಿಗಾಳಿಗಂಜಿ,
ಮರ ತೊರೆಯೊ ವಿರಹದಲಿ ಕಳೆದಿದೆ ಸಂಜಿ.
ಮರಣವದು ಮರುಹುಟ್ಟಿಗಂತೆ ಇರಾದೆ,
ಜತನದಲಿ ಬದುಕಿರಲಿ ಸಲ್ಲದು ತಗಾದೆ..

ರಸಿಕತೆ..!!

ಸಣ್ಣಗಿನ ನಡುವಿಗೆ ರಸಿಕನೆಂದನು-
'ನಾ ಬಲ್ಲೆ, ನಿನ್ನ ಸೊಂಟ ಇದ್ದಂತೆ ಬಳುಕೋ ಲತೆ'
ಸ್ವಲ್ಪ ದಪ್ಪಾದೊಡನೆ ರಸಗುಂದದೆ ಅವನೆಂದನು-
'ಓ ನಲ್ಲೆ, ನನ್ನ ತೋಳಲ್ಲೇ ಅಳೆಯುವೆ ಸುತ್ತಳತೆ'..

ಅಣುವಿಗೆ ವೈರಾಣು..!!

ನಾನೆಂಬ ಅಣುವಿಗದು(ಮನುಷ್ಯ)  ನಾವೆಂಬುದಿಲ್ಲ,
ಸರ್ವಹಿತ  ಬಾಳ್ವೆಯದು ಕಾಣದಿದೆಯಲ್ಲ!
ಪರಿಸರಕೆ ಕಾಣ್ಕೆಯ ಪೋಷಾಕು ಧರಿಸಿ
ಬೆನ್ನಲ್ಲಿ ಚೂರಿ, ನೆತ್ತರನು ಹರಿಸಿ;
ತೊಯ್ದಿರುವ ಪಾಪದ ಹೊಳೆಯಲ್ಲಿ ನಾವೆ,
ಮುಳುಗದಲೆ ಕಾಪಿಡಲು ಸನ್ಮತಿಯ ದಾವೆ;
ತೀರ್ಪಿನಾ ಮರ್ಜಿಗೆ ಪ್ರಕೃತಿ ಅಹವಾಲು,
ದೊರೆತಾಗ ಭಗವಂತನಾ ದಾಪುಗಾಲು;
ಸಮತತ್ತ್ವ ಸಾಧಿಸಲು ದೈವ ಬಗೆದಾಗ
ಅಣುವಿಗೆ ಅಣುವೇ ಸೈ ಪೈಪೋಟಿ ಈಗ..

ಸರಪಳಿಯ ಬಂಧನ..

ಸರಪಳಿಯ ಕೊಂಡಿಯದೋ - ಸಾವಿರದ ಸರಸ;
ಒಂದು ತುದಿ ನೀನು, ಮತ್ತೊಂದು ನಾನು..

ಪ್ರತಿ ಕೊಕ್ಕೆ ನಮ್ ತೆಕ್ಕೆ ಮೂದಲಿಸೊ ರೀತಿ.
ಆದರೆ ಏನಂತೆ? ಮಿಗಿಲೆಮ್ಮ ಪ್ರೀತಿ..

ನಮ್ ಬಾಹು ಬಂಧನಕೆ ಪೈಪೋಟಿ ತಾನೆಂದು,
ಉಕ್ಕು ತಾನುಬ್ಬಿತ್ತು, ಮದವಳಿಯಿತಿಂದು..

ಸರಪಳಿಯ ಚಲನವದು ಅಡಿಗಡಿಯೂ ಜೊತೆಗೆ,
ಪ್ರತಿ ನಡಿಗೆ ನಮ್ಮದದು ನಮ್ಮಾತ್ಮದೆಡೆಗೆ..

ಬದುಕಿನ್ ಆಟ ...ಸಾವಿನ್ ಪಾಠ ...!!

ಕುಂತ್ಕೊಂಡ್ ಬಕ್ಕೊಂಡ್ ಕೂಳೆ ಕಿತ್ರೂ
ಇಲ್ಲ ಹೊತ್ತಿನ್ ಊಟ..
ಉರ್ಯೋ ಸೂರ್ಯನ್  ಹೊಟ್ಟೆ ಕೆಳ್ಗೆ ಹುಟ್ಟು ಸಾವಿನ್ ಆಟ..
ಕಲ್ತು ಕಲ್ತು ಮುದ್ಕಾದ್ರೂನು ನೆತ್ತಿಗೇರ್ದು ಪಾಠ ..
ಸತ್ತು ಸತ್ತು ಹುಟ್ಟೊವ್ರ್ಗೆಲ್ಲ ಬದುಕೇ ಬಗ್ನೀ ಗೂಟ  ...!!!

ನೋವು..ತಂಗಳು..!!

ಬೇಸರಕೆ ಮನದಲಿ
ಜಾಗ ಬೇಡ ತಂಗಲು,
ಹೊಸತು ದಿನವು ಖುಷಿಗೆ ಬಾಗ್ಲು
ಬೇಕೆ ನೋವ ತಂಗಳು..!!?