ಭಾವ ಸಂಚಿ..!!

ಮೆಚ್ಚಿದ ಮನ ನೆಚ್ಚಿಕೊಂಡ ಹುಚ್ಚು ಪ್ರೀತಿ ಹೆಚ್ಚುತ,
ಕಿಚ್ಚಿನ ತರ ಹಚ್ಚಿಕೊಂಡ ಭಾವ ಸಂಚಿ ಬಿಚ್ಚುತ,
ಹೆಚ್ಚು ಕಾಡಲಿಕ್ಕೆ ಕಣ್ಣಂಚಿನಲ್ಲಿ ನಾಚುತ - ನೀನು, ಸಂಚು ಮಾಡಿ ದೋಚಿದೆ..

ಹೊಚ್ಚ ಹೊಚ್ಚ ಭಾವ ಮೂಡಿ ಹೂಗುಚ್ಚವ ನೀಡುತ,
ಅಚ್ಚು ಅಳಿಯದಂತ ಪ್ರೀತಿ ಹೆಸರ ಹಚ್ಚೆ ಗೀಚುತ,
ಬಾಚಿ ತಂದ ಕಪ್ಪೆಚಿಪ್ಪು ಮುತ್ತು ನೀನೆ ಎನ್ನುತ - ನಾನು, ನಿನ್ನೆಡೆಗೆ ಕೈ ಚಾಚಿದೆ 

ಭಾವ ಮಿಶ್ರಿತ ಒಲವು..

ನಾನೆಲ್ಲಿ ಕಳೆದ್ಹೋದೆ ಎನ್ನುತ್ತ ಹುಡುಕಲು
ಕಂಡದ್ದು ನನ್ನನ್ನು ನಿನ್ನಲ್ಲಿಯೇ,
ನನ್ನಯ ಕಣ್ಮುಚ್ಚಿ ಅವಿತಂತೆ ಆಟಾಡಿ
ಹುಡುಕೆ ನೀ ಸಿಕ್ಕದ್ದು ನನ್ನಲ್ಲಿಯೇ..

ಹಿತವಾದ ವೈರಾಣು ಮೈಯೆಲ್ಲ ವ್ಯಾಪಿಸುತ,
ಎಲ್ಲೆಲ್ಲೂ ಬಿಡದಲೆ ಜ್ವರದಂತೆ ಕಾಡುತ,
ಅಣು ಅಣುವೂ ನಿನ್ನದೇ ಧ್ಯಾನವನು ಮಾಡಿರಲು-
ತಲ್ಲೀನ ನಾ ನಿನ್ನ ನೆನಪಲ್ಲಿಯೇ..

ನಿನ್ನುಸಿರ ಏರಿಳಿತ ಬದುಕುವುದಕೆ ಸ್ಫೂರ್ತಿ,
ನಿಶ್ಯಬ್ಧವೇ ನಿಂತು ಅದನಾಲಿಸೋ ರೀತಿ,
ಮಾಯಾವಿ ನೀನಾಗಿ ನನ್ನನ್ನೆ ವ್ಯಾಪಿಸಲು-
ಪರಮಸುಖಿ ನಾ ನಿನ್ನ ವಶದಲ್ಲಿಯೇ..

ಭಾವ ತಂತಿಯ ನೀನು ಶೃತಿಬದ್ಧದಿ ಮೀಟಿ,
ಭಾವನೆಗಳ ಹುಂಡಿಯನು ಮಾಡಿರಲು ಲೂಟಿ,
ಬಹುಭಾವ ಮಿಶ್ರಿತ ಒಲವನ್ನು ತೋರುತಲಿ-
ಸಾಮ್ರಾಜ್ಞಿ ನೀ ನನ್ನ ಬದುಕಲ್ಲಿಯೇ..

(ಮಮತೆ*ಪ್ರೀತಿ)^ n = ಅಮ್ಮ..! (note: n= ∞)

ಚಂದ್ರನ ಕಂಡಾಗ ನೆನಪಾಗೊ ಕೈತುತ್ತು;
ಬಿದ್ದು ಗಾಯಗೊಂಡಾಗ,
ನೇವರಿಸಿ ನೀಡಿದ ಅಕ್ಕರೆಯ ಮುತ್ತು;
ನಿದ್ರೆಗೆ ಮುನ್ನುಡಿಯಂತೆ ಹಾಡಿದ ಲಾಲಿಯ ಮತ್ತು,
ಅಮ್ಮ, ನಿನ್ನ ನಿಷ್ಕಲ್ಮಶ ಮಮತೆಯೇ ನಂಗೆ  ವರವು..

ಕೆಡುಕು ಕಾಡದಂತೆ ಕಾಪಾಡುವ ದೈವ;
ಬೆಂಗಾವಲಾಗಿ ನಿಂತ ಬಾಳಿನ ಬಲ;
ನನ್ನ ಕೇಳದೆಯೇ ಎಲ್ಲ ತಿಳಿದುಕೊಳ್ಳುವ,
ಅಮ್ಮ, ನಿನ್ನ  ಅಪರಿಮಿತ ಪ್ರೀತಿಯೇ ನಂಗೆ ನಲಿವು..

ಅತ್ತಾಗ ಹೆಗಲಾಗಿ, ನಕ್ಕಾಗ ಖುಷಿಯಿಂದ ಹಿಗ್ಗುವ;
ನನ್ನ ಗೆಲುವೆಲ್ಲ ನಂಗಿಂತ ಮಿಗಿಲಾಗಿ ಆಚರಿಸುವ;
ಬಾಳಿನ ಪ್ರತಿ ಹೆಜ್ಜೆಗೂ ಸ್ಫೂರ್ತಿಯಾಗಿ ನಿಂತಿರುವ,
ಅಮ್ಮ, ನಿನ್ನ ಅಸಮಾನ ಮಮತೆಯೇ ನಂಗೆ  ಬಲವು..

ಯಾರೇನಂದರೂ, ನನ್ನನೆಂದೂ ಬಿಟ್ಟುಕೊಡದ;
ನನ್ನ ನಿಂದಿಸುವವರಿಗೆ ಕಿಡಿಕಾರಿ ಸುಮ್ಮನಿರಿಸುವ;
ಅಖಂಡ ಎದುರಾಳಿಗೂ ಅಭೇದ್ಯ ಗೋಡೆಯಾಗಿ ನಿಂತ,
ಅಮ್ಮ, ನಿನ್ನ ಸಾಗರ ವಿಸ್ತೃತ ಪ್ರೀತಿಯೇ ನಂಗೆ ಕಾವಲು..