ಓ ಹನುಮ..

ಕೇಸರೀನಂದನ ಚಂದನಲಂಕೃತ
ತುಳಸೀಧಾರಣ ಓ ಹನುಮ;
ನಿಜಗುಣ ಪಾಲಕ, ಶಕ್ತಿ ಪ್ರದಾಯಕ
ಧೈರ್ಯದ ಧಾತು ಓ ಹನುಮ..
ರಾಮನ ಚರಣವ ನಿಜದಲಿ ಸೋಕಿದ
ಪುಣ್ಯದ ಜೀವ ನೀ ಹನುಮ;
ನಿನ್ನನು ಭಜಿಸಲು ರಾಮನೂ ಒಲಿಯುವ
ಧನ್ಯತಾಭಾವ ಓ ಹನುಮ..
ಕಷ್ಟವ ಸುಲಲಿತ ನೀಗಿಸೆ ಸೂಚಿಸಿ
ಪರ್ವತವೆತ್ತಿದೆ ಓ ಹನುಮ;
ಭೋರ್ಗರೆವ ಸಂತಾಪದ ಕಡಲನು
ದಾಟಿಸಿ ನಡೆಸುವೆ ನೀ ಹನುಮ..
ವಾಯು ವಿಹಾರನೆ, ಭಕುತಿಗೆ ಪ್ರೇರಣೆ
ರಾಮನ ಭಂಟನೆ ಓ ಹನುಮ;
ತೇಜೋವರ್ಯನೆ, ಸರ್ವತಾ ಪೂಜ್ಯನೆ
ಇಷ್ಟ ದೈವವೇ ನೀ ಹನುಮ..

ಅಸಲು-ನಕಲು..!

ಪ್ರೇಮ ನಕಲು ಮಾಡೊ ವಿದ್ಯೆ
ನಂಗೆ ಗೊತ್ತಿಲ್ಲ ಕೇಳೆ ಜಾನು,
ಅಸಲಿಗೆ ನಿನ್ನ ಪ್ರೇಮ ಬಿಟ್ಟು
ನಂಗೆ ಬೇರೆ ಗೊತ್ತಿಲ್ಲ ಏನೂ.

ನಾ ಸ್ನೇಹಿತ..

ಸಂಜೆ ರಾಗಕೆ ಸಹಗೀತದಂತೆ
ನನ್ನ ನಿನ್ನ ಸಹಚಾರವು;
ತಂಪು ಚಾರಣವೂ ಮತ್ತೇರುವಂತೆ
ಒಲವೇ ನಿನ್ನ ಸಹವಾಸವು..

ಸೋಜಿಗವೆನಿಸುವ ಆಪ್ತತೆ ನಿಂದು
ನಾನೇ ನೀನೆನ್ನುವಂಥ ಭಾವ;
ನಾ ಬೇರೆ ನೀ ಬೇರೆ ಅಲ್ಲವೆಂದು
ಮೇಳೈಸಿದಂತಿಹುದು ನಮ್ಮ ಜೀವ..

ದುಂಬಾಲು ಬಿದ್ದಾಗ ನನ್ನ ಕೋಪ
ಶಾಂತತೆ ಕಾಪಾಡೊ ಸಹನೆ ನೀನು;
ಕಂಗಾಲು ಆಗದ ರೀತಿಯಲ್ಲಿ
ಸಂಭಾಳಿಸಿ ನಡೆಸೊ ನಿಂಗೆ ಶರಣು..

ಎಲ್ಲ ನಿನ್ನದೇ ಪರಿಣಾಮ ನೋಡು
ಆದೆ ನಾನಂತು ತುಸು ಮೋಹಿತ;
ಆಣೆ ಮಾಡುತ್ತ ಸಂಗಾತ ಸಾಗುವೆ
ಬಾಳ್ವೆ ಯಾನದಲಿ ನಾ ಸ್ನೇಹಿತ..