ಕಾಡದ ಕ್ಷಣಿಕ ಕೋಪ..

ಕಡಲ ಹೊರಗೆಲ್ಲ ದಾಂಧಲೆಯ ಅಲೆ,
ಒಳಗೆ ನೆಲೆಸಿಹುದು ಶಾಂತತೆಯ ಸೆಲೆ;
ನಿನ್ನ ಮೇಲಿನ ನನ್ನ ಕೋಪವೂ ಕೂಡ -
ಆಗಾಗ ಉಕ್ಕುವುದದೇನೊ ಸತ್ಯ;
ಆದರೂ ಒಡಲಾಳದಲ್ಲಿರುವಂತ
ಒಲವಿನಗಾಧತೆಯ ಕಾಂತಿಗಿಲ್ಲ ಎಲ್ಲೆ..
ನಾ ನಿನ್ನ ನಲ್ಲ, ನೀ ನನ್ನ ನಲ್ಲೆ
ಕಾಡೋ ಕೋಪದಸ್ತಿತ್ವವದು -
ಇಂದಿಗೂ ಸುಳ್ಳೆ, ಎಂದೆಂದಿಗೂ ಸುಳ್ಳೆ..

ವರಮಹಾಲಕ್ಷ್ಮಿ ವ್ರತ..!

ಆದಿ ಲಕ್ಷ್ಮಿಯಿಂದ ಮೊದಲಾಗಿ ,
ಧಾನ್ಯ ಲಕ್ಷ್ಮಿಯಿಂದ ಹಸಿವು ನೀಗಿ,
ವಿದ್ಯಾ ಲಕ್ಷ್ಮಿಯ ಆಶೀರ್ವಾದ ಸದಾ ಇದ್ದು,
ಧ್ಯೇಯ ಮುಟ್ಟಲು ಗಜ ಲಕ್ಷ್ಮಿಯು ಶಕ್ತಿ ನೀಡಿ,
ಕಷ್ಟ-ಕಾರ್ಪಣ್ಯ ಎದುರಿಸಲು ಧೈರ್ಯ ಲಕ್ಷ್ಮಿಯು ಕೃಪೆ ತೋರಿ,
ಸಂಸಾರ ನೌಕೆಯಲಿ ಸಂತಾನ ಲಕ್ಷ್ಮಿಯು ಒಲಿದು,
ನಗು-ನೆಮ್ಮದಿ ಜೀವನಕೆ ವಿಜಯ ಲಕ್ಷ್ಮಿಯು ಬುನಾದಿಯಾಗಿರಲು,
ಧನ ಲಕ್ಷ್ಮಿಯು ತಾನಾಗೇ ಒಲಿವುದು ಖಾತ್ರಿ ಎಂಬ ನಂಬಿಕೆಯಿಂದ-
ಅಷ್ಟ ಲಕ್ಷ್ಮಿಯರ ಪೂಜಾ ದ್ಯೋತಕವಾದ
ವರಮಹಾಲಕ್ಷ್ಮಿ ವ್ರತದ ಶುಭಾಶಯಗಳು..