ಬಹುಮಾನ..!!

ಒಲವ ಮಿಂಚಿನ ಆಗಮನ
ಒಬ್ಬಂಟಿಯಾಗಿದೆ ನನ್ನ ಪಯಣ..
ಹೃದಯ ಗೀತೆ ಹೊರಡಲು ಕಾರಣ ನಿನ್ನ ನಯನ,
ಬೇಕಿದೆ ನಿನ್ನೊಂದಿಗಿನ ಯಾನ.
ಚಡಪಡಿಸೋ ಈ ನನ್ನ ಮನ,
ಕನವರಿಕೆಗೆ ನೀನೇ ತಾನೆ ಕಾರಣ.!?
ತಣ್ಣನೆ ಗಾಳಿ ಮೈ ಸವರುತ್ತ ಸರಿದಿರಲು,
ನೀ ಸುಳಿದಂತೆ ನನಗನುಮಾನ...
ಸೋತೆನು ನಲ್ಲೆ ತನಿಖೆ ನೀನೇ ಮಾಡಿರಲು,
ಮುತ್ತೇ ನಿನಗೆ ನನ್ನ ಬಹುಮಾನ.. :)

ನಲ್ಲನ ಆತಂಕ..!!!

ಆಸು ಪಾಸಿನ ಗಾಳಿ ಸೋಕುತಲಿ ನಿನ್ನ
ಆಗಾಗ ಅಲೆದಿಹುದು ಏಕೆ ಕೇಳು;
ನಲ್ಲ ನಾನಿಲ್ಲಿ ಬಳಿಯಲ್ಲೇ ಇರುವೆನು
"ಕಾಳಜಿಯು ಬೇಕಿಲ್ಲ"ವೆಂದು ಹೇಳು..!!

ಆಪ್ತತೆಯ ಹುಡುಕಾಟ..!

ಭಾವ-ಬರದ ಸಂತೆಯಲ್ಲಿ ತೆರೆದಿಟ್ಟ ಬದುಕು,
ಖರೀದಿಗೆ ಇಟ್ಟಂತಿದೆ ಬಾಂಧವ್ಯದ ಮೆಲುಕು..
ಯಾರು ಯಾರಿಗೆ ಆದರೊ,
ಯಾರು ಸಂಗಡ ನಿಂತರೊ!?
ಅಲ್ಪ ದಾರಿಯ ಪಯಣದಲಿ
ಕಂಡುಕೊಳ್ಳುವುದು ಹೇಗೆ!?
ಸನಿಹದಲಿ ಕೇಳದಂಥ ಆಪ್ತತೆಯ ದನಿಯು,
ದೂರಾದಾಗ ಕೀರಲಾಗಿ ಕಾಡುವುದು ಏಕೆ?
ದೂರ ನಡೆದು ಬಂದಾಗಿದೆ,
ಭಾವನೆಯ ಜೋಳಿಗೆ ಬರಿದಾಗಿದೆ;
ಅತೃಪ್ತ ಮನಸಿಗೆ ತೃಪ್ತ ಸಂತೋಷದ
ಸಣ್ಣ ಬೀಡೊಂದು ಬೇಕಾಗಿದೆ..

ನನ್ನ ಶಾಮಲೆ..!!

ಕೋಪವನೆಲ್ಲ ಸಹಿಸಿ,                      
ಪ್ರೀತಿಯಿಂದಲೇ ನಗಿಸಿ,          
ಅರ್ಥೈಸಿಕೊಂಡ ಕೋಮಲೆ - ನನ್ನ ಶಾಮಲೆ..

ಸಮಭಾವದ ನಂಬಿಕೆ ತರಿಸಿ,
ಸಹಬಾಳ್ವೆಯ ನಂಬಿಕೆ ಇರಿಸಿ,
ಸಾಂಗತ್ಯಕೆ ಅಣಿಯಾದವಳೆ - ನನ್ನ ಶಾಮಲೆ..

ದುಃಖ ತನ್ನಲ್ಲೇ ಅಡಗಿಸಿ,
ನಗೆಯ ಜೋಳಿಗೆಯ ತುಂಬಿಸಿ,
ಸ್ಫೂರ್ತಿ ಸೆಲೆಯಾದ ಬಾಲೆ - ನನ್ನ ಶಾಮಲೆ..

ಅಗಣಿತ ಭಾವನೆಯ ಗುಣಿಸಿ,
ಪ್ರೇಮ ದುಂದುಭಿಯ ನುಡಿಸಿ,
ಭವ್ಯ ಭವಿತಕ್ಕೆ ನಾಂದಿಯಾದವಳೆ;
ಅವಳೇ,ಅವಳೇ - ನನ್ನ ಶಾಮಲೆ..