ನೆನಪಿನ ಬಾಣ..

ನೆನಪೆಂಬುದಿಹುದಲ್ಲಿ ಕಾಲ ಗರ್ಭದ ಒಳಗೆ,
ಭೂಗತವಾಗದು ಏಕೆ ಕಾಣದಂತೆ;
ಆಗೊಮ್ಮೆ ಈಗೊಮ್ಮೆ ಕಣ್ಣೀರು ಚಿಮ್ಮಿಸಲು,
ಭಾವನೆಯೇ ಹೊಕ್ಕಿಹುದು ಬಾಣದಂತೆ-ಯೋಗರಾಜ..

ಪೀಠಿಕೆ..

ನೀ ಒಲವ ದೇವತೆ, ನಾ ನಿನ್ನ ಭಕ್ತ;
ನಿನ್ನ ಆರಾಧನೆಯಲೇ ನಾನಿನ್ನು ಆಸಕ್ತ.
ನೀ ನೋಡೋ ಗುಂಗಿಗೇ ನಾ ಪಾನಮತ್ತ,
ಎಲ್ಲ ಪೀಠಿಕೆಯು ನಿನ್ನೊಲವ ನಿಮಿತ್ತ...ನಿನ್ನೊಲವ ನಿಮಿತ್ತ...

smileಉ.. :)

ಯುದ್ಧ ನಿಲ್ಲಿಸಲೊಂದು ನಗುವು ಸಾಕು,
ಹಾಗೇ ಒಂದು smileಉ ಬಿಸಾಕು.. 

ಜೀವಕಿನ್ನೇನು ಬೇಕು..!?

ಚಂದ ಸಪೂರ ಮೈಮಾಟ
ನಿನ್ನ ನಡಿಗೆ ನಾಜೂಕು;
ತುಂಟ ನಗುವಿನ ಚೆಲ್ಲಾಟ,
ದಾರಿ ತಪ್ಪಲದು ಸಾಕು..
ನೀನು ಮುಡಿದಿರೋ ಹೂವಿಗೂ ಕೂಡ
ಏನೋ ಗಳಿಸಿದ ಧಿಮಾಕು
ನಿನ್ನ ಸೋಕಿರುವ ಗಾಳಿ ಹೇಳುತಿದೆ
"ಜೀವಕಿನ್ನೇನು ಬೇಕು..ಜೀವಕಿನ್ನೇನು ಬೇಕು..!?"

ಸಂಚು.!

ಪೂರ್ವನಿಯೋಜಿತ ಸಂಚೇನು ಇದು?
ನಿನ್ನ ಕಂಡೊಡನೆ ಮರುಳಾಗಿಬಿಟ್ಟೆ..
ಕಣ್ಗಳ ಸಂಘಟಿತ ಹೊಂಚಿನs ಬಲೆಗೆ;
ನೋಡುತ್ತಾ ನಿಂತಲ್ಲೆ ನಾ ನಿಂತುಬಿಟ್ಟೆ.

ಬಾಳ ನಿಲ್ದಾಣ..

ನನ್ನ ಬಾಳ ದಾರಿ-
ಎಷ್ಟಾದರೂ ಕವಲೊಡೆಯಲಿ,
ಎಷ್ಟಾದರೂ ದಿಕ್ಕು ಬದಲಿಸಲಿ,
ಎಲ್ಲಾದರೂ ಹಾದಿ ತಪ್ಪಿ ಮತ್ತೊಂದೆಡೆ ತಿರುಗಲಿ;
ಭಯವಂತು ಇಲ್ಲ...
ಏಕೆಂದರೆ ಒಂದಂತು ಖಾತ್ರಿ-
ನನ್ನ ಎಲ್ಲ ದಿಕ್ಕು-ದಾರಿಗಳಿಗೂ
ಇರುವುದೊಂದೇ ನಿಲ್ದಾಣ - ನಿನ್ನ ಮನಸು..