ನುರಿತ ಪ್ರೇಮಿ..

ನಿನ್ನ ಕಣ್ಸನ್ನೆ ಅರಿತ ನಾನೀಗ

ನಿನ್ನೊಲವ ಕುರಿತ ಹಂಗಾಮಿ;

ಶಾಶ್ವತ ಸಾಂಗತ್ಯ ತ್ವರಿತಗೊಳಿಸಿನ್ನು

ನಾನಾದೆನು ನುರಿತ ಪ್ರೇಮಿ..!!

ज़िद्दी..!!

ये सोचते सोचते बरसो गुज़र गये, 

के 'किसी को मेरी तन्हाई का एहसास ज़रूर होगा..'

लम्हे फिसल गये, रास्ते बदल गये

पर मेरे ग़म का नशा तो ना उतरने की ज़िद कर बैठा !

ಪರಿಣಾಮ..!

ನಿನ್ನುಸಿರು ಸೋಕಿದ ಪರಿಣಾಮ -

ಮನ ಮುಟ್ಟಿ ಮನ ತಟ್ಟಿ

ಪ್ರೇಮ ನೆಟ್ಟಂತಾಯ್ತು,

ನೋವಿನ್ನು ತುಟ್ಟಿ ನಲಿವೊಂದೇ ಗಟ್ಟಿ

ನನ್ನನ್ನು ನಿಂಗಿನ್ನು ಕಟ್ಟಿದಂತಾಯ್ತು..

ಮನನ..!

ಮನದ ಒಡ್ಡೋಲಗದಲ್ಲಿ

ನಿನ್ನೆನಪಿನ ಮನನ!

ಸುಧೆಯ ತೆರದಿ ನಿನ್ನ ಮಾತು -

ತಡೆಯಲೆಲ್ಲಿ ಸಾಧ್ಯವಿನ್ನು

ಒಲವು ಅಲ್ಲೇ ಜನನ..

ಮುತ್ತಿನ ದಾನಿ..!!

ಮೆದುಳ ಪದರದಾಳದಲ್ಲಿ

ಸಣ್ಣದೊಂದು ಗುಮಾನಿ,

ನೀನೇ ಇರಬೇಕು -

ಕೋಣೆಯಲ್ಲಿ ನಾ ವಿರಮಿಸಿರಲು,

ಕದ್ದು ಮುತ್ತನಿಟ್ಟ,

ಸಮಯೋಚಿತ ದಾನಿ..!

ತುರ್ತು ಗಮನ..!!

ನನ್ನೆಡೆಗೆ ಇಗೋ ಬೇಕಿದೆ 

ನಿನ್ನ ತುರ್ತು ಗಮನ,

ಎದೆಬಡಿತದ ಲಯದ ಕೊರತೆ

ನೀಗಿಸೋ ನಿನ್ನಾಗಮನ..

           ಅತೀವ ಸೆಳೆತ ನಿನ್ನ ನೋಟ

           ತೀಕ್ಷ್ಣ ಕೇಂದ್ರ ಬಿಂದು,

           ಸಸಾರವೆನಿಸೋ ಉಸಿರಾಟಕೂ

           ಕ್ಲಿಷ್ಟ ಸ್ಥಿತಿಯು ನಂದು.!

ರೂಢಿಯಲ್ಲಿ ಕಂಡರಿಯದ

ಸುಪ್ತ ಹರ್ಷದಂತೆ,

ಗಾಢವಾಗಿ ನೆಲೆಯೂರಿದೆ

ನಡೆಸಿ ಒಲವ ಸಂತೆ..

            ದೂರ ಭಾರ ಸಹಿಸಲೊಲ್ಲೆ

            ವಿರಹ ಇರಿವ ಬಾಕು,

            ಅಡಿಗಡಿ-ಅಣುರೇಣುವಿಗೂ

            ನಿನ್ನ ಸನಿಹ ಬೇಕು,

            ಸನಿಹದೊಸಗೆ ಸಾಕು..!

ಸೂರ್ಯ-ಸೂರ್ಯಕಾಂತಿ..!!

 

ಆಹಾ ಎಂಥ ಚೆಲುವ ಮೊಗವು

ಸೂರ್ಯಕಾಂತಿ ಮೆರುಗೊ ಲಲನೆ,

ನೇಸರನ್ನೇ ತಿರುಗಿ ತಿರುಗಿ

ದಿನವು ಪೂರಾ ಹೊಳೆವ ಚಲನೆ..

ಬೆಳಗಿನ ಕಿರಣ ಸೋಕಲೆದ್ದು

ನಗುವ ಧರಿಸಿ ನೋಡಲಂತೂ,

ಸೂರ್ಯ ತಾನೇ ನಾಚಿ ನುಣುಚಿ

ಕೆಂಪಗಾಗೋ ದೃಶ್ಯವೆಂತು..!

ಹೂವ ಪ್ರೇಮ ಸೆಳೆತ ಮೀರಿ

ದಿಕ್ಕು ತಪ್ಪೋ ಅಮಲು ಸೋಕಿ, 

ರವಿಯು ಭುವಿಯ ಬೆಳಗೊ ಕೆಲಸ 

ತೊಡರಿ ಕೆಡುವುದೊಂದು ಬಾಕಿ..!

ನಗುಮೊಗದಲೇ ದಿನದ ಶುರುವು

ಪ್ರೇಮ ಹೊನಲಿನಲ್ಲೆ ನಲಿವು,

ಎಂದೋ ಎಲ್ಲೋ ಮಿಲನ ಸಿಗುವ

ಆಸೆಗಂತು ಇಲ್ಲ ಬರವು..