ವೀರೋಚಿತ ವೇದನೆ..!!

ನಿದಿರೆಯು ಎಲ್ಲ ದೂರಾಗಿಹುದು
ಕಾಣದ ತೀರದ ಲೋಕದೊಳು,
ವಿರಹದ ಮದಿರೆ ನಶೆ ಏರಿಹುದು
ತೀರದ ಮೋಹದ ಶಾಖದೊಳು..
ಬಂದೊಮ್ಮೆ ನನ್ನಪ್ಪಲು ಒಲ್ಲೆ ಎನ್ನುತ ನೀನು ಕಾಡಿರುವೆ,
ಯಾರಿಗೂ ಕೇಳದ ಹಾಗೆ ನಿನ್ನಯ ಒಡನಾಟವ ನಾ ಬೇಡಿರುವೆ..
ಲೋಕದಲೆಲ್ಲ ನಾನೇ ವೀರನು
ಜ್ವಲಿತ ವಿರಹದಾ ಕದನದಲಿ,
ಅದಕೇ ದಕ್ಕಿದೆ ವೀರೋಚಿತದಿ
ಬಳುವಳಿ ವೇದನೆ ರೂಪದಲಿ..

ಖಾತ್ರಿ..!

ಸಲಿಗೆಯ ಸುಲಿಗೆ ಮಾಡೆಂದಿಹುದು ನಿನ್ನ ಕಣ್ಣೋಟ,
ಮನವು ಮಾರ್ದನಿಸಿಹುದು ತೋರೆಂದು ಕಳ್ಳಾಟ;
ತಪಿಸೊ ತಾರುಣ್ಯಶೀಲ-
ನಾನಂತು ನಿನ್ನ ಲೋಲ;
ಪ್ರೇಮ ದಾರ್ಶನಿಕನಾದೆ ನೀ ಕಂಡ ಮೇಲೆ..
               ಅನಾಹತ ಭಾವವ ಬೀರೆಂದಿಹುದು ನಿನ್ನ ಒಡನಾಟ,
               ಒಲವು ಭೋರ್ಗರಿಸಿಹುದು ಇರೆ ನಿನ್ನ ಸುಳಿದಾಟ;
               ಅರಳೊ ಕೆಂದಾವರೆ ನೀನು-
               ಮುಂಜಾವು ರವಿ ನಾನು;
               ಪ್ರೇಮ ಸಂಜಾತ ಖಾತ್ರಿ ನೀ ಸಿಕ್ಕ ಮೇಲೆ..