ಸೂರ್ಯ-ಸೂರ್ಯಕಾಂತಿ..!!

 

ಆಹಾ ಎಂಥ ಚೆಲುವ ಮೊಗವು

ಸೂರ್ಯಕಾಂತಿ ಮೆರುಗೊ ಲಲನೆ,

ನೇಸರನ್ನೇ ತಿರುಗಿ ತಿರುಗಿ

ದಿನವು ಪೂರಾ ಹೊಳೆವ ಚಲನೆ..

ಬೆಳಗಿನ ಕಿರಣ ಸೋಕಲೆದ್ದು

ನಗುವ ಧರಿಸಿ ನೋಡಲಂತೂ,

ಸೂರ್ಯ ತಾನೇ ನಾಚಿ ನುಣುಚಿ

ಕೆಂಪಗಾಗೋ ದೃಶ್ಯವೆಂತು..!

ಹೂವ ಪ್ರೇಮ ಸೆಳೆತ ಮೀರಿ

ದಿಕ್ಕು ತಪ್ಪೋ ಅಮಲು ಸೋಕಿ, 

ರವಿಯು ಭುವಿಯ ಬೆಳಗೊ ಕೆಲಸ 

ತೊಡರಿ ಕೆಡುವುದೊಂದು ಬಾಕಿ..!

ನಗುಮೊಗದಲೇ ದಿನದ ಶುರುವು

ಪ್ರೇಮ ಹೊನಲಿನಲ್ಲೆ ನಲಿವು,

ಎಂದೋ ಎಲ್ಲೋ ಮಿಲನ ಸಿಗುವ

ಆಸೆಗಂತು ಇಲ್ಲ ಬರವು..