ಚಳಿ-ಬೆಳಕಿನ ಕಣ್ಣಾಮುಚ್ಚಾಲೆ..

ಹೊರಗೆ ಚಳಿಯ ತಡೆಯಲಾಗದೆ
ಬೆಳ್ಳಿ ಬೆಳಕು ನರಳಿದೆ,
ಬೆಚ್ಚಗಿರಲು ಮನೆಯ ನುಸುಳೇ
ಹೊರಗೆ ಮಬ್ಬಾವರಿಸಿದೆ..

ಸುತ್ತಲೆತ್ತಲೂ ಮಬ್ಬುಗತ್ತಲು

ತಂಡಿ ಚಳಿಯದೇ ಆರ್ಭಟ;

  ಬೆಳಕು ತಾನು ನಗುವ ಬೀರಿದೆ

ಮನೆಯ ಒಳಗಡೆ ನೆಲೆಸುತಾ..

ಚಳಿಯು ಅಷ್ಟು ಸುಲಭ ಬಿಡುವುದೇ!?
ಬೆಳಕ ಬೆನ್ನು ಹತ್ತಿದೆ;
ಸೊಂದಿಗೊಂದಿಯ ಬಿಡದೆ ತೂರುತ
ಸೂರಿನೊಳಗಡೆ ನುಸುಳಿದೆ..
ಬೆಳಕು ಬೆದರಿ ಧೈರ್ಯ ಚದುರಿ
ರಗ್ಗಿನಾಸರೆ ಪಡೆದಿದೆ;
ಸೂರಿನೊಳಗೂ ಮಬ್ಬು ಕವಿಯುತ
ಬೆಳಕು ರಗ್ಗೊಳಗವಿತಿದೆ..
ಕೊನೆಗೂ ಬೆಚ್ಚಗೆ ಮಲಗಿದೆ..